תנ"ך - משלי - פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא


משלי פרק ה

א בְּ֭נִי לְחָכְמָתִ֣י הַקְשִׁ֑יבָה    לִ֝תְבֽוּנָתִ֗י הַט־אָזְנֶֽךָ׃
ב לִשְׁמֹ֥ר מְזִמּ֑וֹת    וְ֝דַ֗עַת שְׂפָתֶ֥יךָ יִנְצֹֽרוּ׃
ג כִּ֤י נֹ֣פֶת תִּ֭טֹּפְנָה שִׂפְתֵ֣י זָרָ֑ה    וְחָלָ֖ק מִשֶּׁ֣מֶן חִכָּֽהּ׃
ד וְֽ֭אַחֲרִיתָהּ מָרָ֣ה כַֽלַּעֲנָ֑ה    חַ֝דָּ֗ה כְּחֶ֣רֶב פִּיּֽוֹת׃
ה רַ֭גְלֶיהָ יֹֽרְד֣וֹת מָ֑וֶת    שְׁ֝א֗וֹל צְעָדֶ֥יהָ יִתְמֹֽכוּ׃
ו אֹ֣רַח חַ֭יִּים פֶּן־תְּפַלֵּ֑ס    נָע֥וּ מַ֝עְגְּלֹתֶ֗יהָ לֹ֣א תֵדָֽע׃

ז וְעַתָּ֣ה בָ֭נִים שִׁמְעוּ־לִ֑י    וְאַל־תָּ֝ס֗וּרוּ מֵֽאִמְרֵי־פִֽי׃
ח הַרְחֵ֣ק מֵֽעָלֶ֣יהָ דַרְכֶּ֑ךָ    וְאַל־תִּ֝קְרַ֗ב אֶל־פֶּ֥תַח בֵּיתָֽהּ׃
ט פֶּן־תִּתֵּ֣ן לַֽאֲחֵרִ֣ים הוֹדֶ֑ךָ    וּ֝שְׁנֹתֶ֗יךָ לְאַכְזָרִֽי׃
י פֶּֽן־יִשְׂבְּע֣וּ זָרִ֣ים כֹּחֶ֑ךָ    וַֽ֝עֲצָבֶ֗יךָ בְּבֵ֣ית נָכְרִֽי׃
יא וְנָֽהַמְתָּ֥ בְאַֽחֲרִיתֶ֑ךָ    בִּכְל֥וֹת בְּ֝שָֽׂרְךָ֗ וּשְׁאֵרֶֽךָ׃
יב וְֽאָמַרְתָּ֗ אֵ֭יךְ שָׂנֵ֣אתִי מוּסָ֑ר    וְ֝תוֹכַ֗חַת נָאַ֥ץ לִבִּֽי׃
יג וְֽלֹא־שָׁ֭מַעְתִּי בְּק֣וֹל מוֹרָ֑י    וְ֝לִֽמְלַמְּדַ֗י לֹֽא־הִטִּ֥יתִי אָזְנִֽי׃
יד כִּ֭מְעַט הָיִ֣יתִי בְכָל־רָ֑ע    בְּת֖וֹךְ קָהָ֣ל וְעֵדָֽה׃
טו שְׁתֵה־מַ֥יִם מִבּוֹרֶ֑ךָ    וְ֝נֹֽזְלִ֗ים מִתּ֥וֹךְ בְּאֵרֶֽךָ׃
טז יָפ֣וּצוּ מַעְיְנֹתֶ֣יךָ ח֑וּצָה    בָּֽ֝רְחֹב֗וֹת פַּלְגֵי־מָֽיִם׃
יז יִֽהְיוּ־לְךָ֥ לְבַדֶּ֑ךָ    וְאֵ֖ין לְזָרִ֣ים אִתָּֽךְ׃
יח יְהִֽי־מְקוֹרְךָ֥ בָר֑וּךְ    וּ֝שְׂמַ֗ח מֵאֵ֥שֶׁת נְעוּרֶֽךָ׃
יט אַיֶּ֥לֶת אֲהָבִ֗ים    וְֽיַעֲלַ֫ת חֵ֥ן
דַּ֭דֶּיהָ יְרַוֻּ֣ךָ בְכָל־עֵ֑ת    בְּ֝אַֽהֲבָתָ֗הּ תִּשְׁגֶּ֥ה תָמִֽיד׃
כ וְלָ֤מָּה תִשְׁגֶּ֣ה בְנִ֣י בְזָרָ֑ה    וּ֝תְחַבֵּ֗ק חֵ֣ק נָכְרִיָּֽה׃
כא כִּ֤י נֹ֨כַח ׀ עֵינֵ֣י יְ֭הוָה דַּרְכֵי־אִ֑ישׁ    וְֽכָל־מַעְגְּלֹתָ֥יו מְפַלֵּֽס׃
כב עֲֽוו‍ֹנֹתָ֗יו יִלְכְּדֻנ֥וֹ אֶת־הָֽרָשָׁ֑ע    וּבְחַבְלֵ֥י חַ֝טָּאת֗וֹ יִתָּמֵֽךְ׃
כג ה֗וּא יָ֭מוּת בְּאֵ֣ין מוּסָ֑ר    וּבְרֹ֖ב אִוַּלְתּ֣וֹ יִשְׁגֶּֽה׃


תנ"ך - משלי - פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא


יש לך שאלה או הערה?