תנ"ך מנוקד
 
תנ"ך - דברי הימים - הכול
דברי הימים א פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט - דברי הימים ב פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא לב לג לד לה לו


דברי הימים א פרק טו

א ויעש-לו בתים, בעיר דויד; ויכן מקום לארון האלוהים, ויט-לו אוהל.  ב אז, אמר דויד, לא לשאת את-ארון האלוהים, כי אם-הלויים:  כי-בם בחר יהוה, לשאת את-ארון יהוה ולשרתו--עד-עולם.  {פ}

ג ויקהל דויד את-כל-ישראל, אל-ירושלים, להעלות את-ארון יהוה, אל-מקומו אשר-הכין לו.  ד ויאסוף דויד את-בני אהרון, ואת-הלויים.  {ס}  ה לבני, קהת--אוריאל השר, ואחיו מאה ועשרים.  {ס}  ו לבני, מררי--עשיה השר, ואחיו מאתיים ועשרים.  {ס}  ז לבני, גרשום--יואל השר, ואחיו מאה ושלושים.  {ס}  ח לבני, אליצפן--שמעיה השר, ואחיו מאתיים.  {ס}  ט לבני, חברון--אליאל השר, ואחיו שמונים.  {ס}  י לבני, עוזיאל:  עמינדב השר--ואחיו, מאה ושנים עשר.  {פ}

יא ויקרא דויד, לצדוק ולאביתר הכוהנים; וללויים, לאוריאל עשיה ויואל שמעיה, ואליאל, ועמינדב.  {ס}  יב ויאמר להם, אתם ראשי האבות ללויים; התקדשו, אתם ואחיכם, והעליתם את ארון יהוה אלוהי ישראל, אל-הכינותי לו.  יג כי למבראשונה, לא אתם--פרץ יהוה אלוהינו בנו, כי-לא דרשנוהו כמשפט.  יד ויתקדשו, הכוהנים והלויים, להעלות, את-ארון יהוה אלוהי ישראל.  טו וישאו בני-הלויים, את ארון האלוהים, כאשר ציווה משה, כדבר יהוה--בכתפם במוטות, עליהם.  {פ}

טז ויאמר דויד, לשרי הלויים, להעמיד את-אחיהם המשוררים, בכלי-שיר נבלים וכינורות ומצלתיים--משמיעים להרים-בקול, לשמחה.  {פ}

יז ויעמידו הלויים, את הימן בן-יואל, ומן-אחיו, אסף בן-ברכיהו;  {ס}  ומן-בני מררי אחיהם, איתן בן-קושיהו.  יח ועימהם, אחיהם המשנים:  זכריהו בן ויעזיאל ושמירמות ויחיאל ועוני אליאב ובניהו ומעשיהו ומתיתיהו ואליפלהו ומקניהו ועובד אדום, ויעיאל--השוערים.  יט והמשוררים, הימן אסף ואיתן--במצלתיים נחושת, להשמיע.  כ וזכריה ועזיאל ושמירמות ויחיאל, ועוני ואליאב, ומעשיהו, ובניהו--בנבלים, על-עלמות.  כא ומתיתיהו ואליפלהו, ומקניהו ועובד אדום, ויעיאל, ועזזיהו--בכינורות על-השמינית, לנצח.  כב וכנניהו שר-הלויים, במשא--יסור, במשא, כי מבין, הוא.  כג וברכיה, ואלקנה, שוערים, לארון.  כד ושבניהו ויושפט ונתנאל ועמשיי וזכריהו ובניהו ואליעזר, הכוהנים, מחצרים בחצוצרות, לפני ארון האלוהים; ועובד אדום ויחייה, שוערים לארון.  כה ויהי דויד וזקני ישראל, ושרי האלפים:  ההולכים, להעלות את-ארון ברית-יהוה מן-בית עובד-אדום--בשמחה.  {פ}

כו ויהי, בעזור האלוהים, את-הלויים, נושאי ארון ברית-יהוה; ויזבחו שבעה-פרים, ושבעה אילים.  כז ודויד מכורבל במעיל בוץ, וכל-הלויים הנושאים את-הארון, והמשוררים, וכנניה השר המשא המשוררים; ועל-דויד, איפוד בד.  כח וכל-ישראל, מעלים את-ארון ברית-יהוה, בתרועה ובקול שופר, ובחצוצרות ובמצלתיים; משמיעים, בנבלים וכינורות.  כט ויהי, ארון ברית יהוה, בא, עד-עיר דויד; ומיכל בת-שאול נשקפה בעד החלון, ותרא את-המלך דויד מרקד ומשחק, ותיבז לו, בליבה.  {פ}


תנ"ך מנוקד
 
תנ"ך - דברי הימים - הכול
דברי הימים א פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט - דברי הימים ב פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא לב לג לד לה לו


יש לך שאלה או הערה?