תנ"ך מנוקד
 
תנ"ך - עזרא / נחמיה - הכול
עזרא פרק א ב ג ד ה ו ז ח ט י - נחמיה פרק א ב ג ד ה ו ז ח ט י יא יב יג


נחמיה פרק ט

א וביום עשרים וארבעה לחודש הזה, נאספו בני-ישראל בצום ובשקים, ואדמה, עליהם.  ב וייבדלו זרע ישראל, מכול בני נכר; ויעמדו, ויתוודו על-חטאותיהם, ועוונות, אבותיהם.  ג ויקומו, על-עומדם, ויקראו בספר תורת יהוה אלוהיהם, רביעית היום; ורביעית מתוודים ומשתחווים, ליהוה אלוהיהם.  {פ}

ד ויקם על-מעלה הלויים, ישוע ובני קדמיאל שבניה בוני שרביה--בני כנני; ויזעקו בקול גדול, אל-יהוה אלוהיהם.  ה ויאמרו הלויים ישוע וקדמיאל בני חשבניה שרביה הודייה, שבניה פתחיה, קומו ברכו את-יהוה אלוהיכם, מן-העולם עד-העולם; ויברכו שם כבודך, ומרומם על-כל-ברכה ותהילה.  ו אתה-הוא יהוה, לבדך--אתה עשית את-השמיים שמי השמיים וכל-צבאם הארץ וכל-אשר עליה הימים וכל-אשר בהם, ואתה מחייה את-כולם; וצבא השמיים, לך משתחווים.  ז אתה-הוא, יהוה האלוהים, אשר בחרת באברם, והוצאתו מאור כשדים; ושמת שמו, אברהם.  ח ומצאת את-לבבו, נאמן לפניך, וכרות עימו הברית לתת את-ארץ הכנעני החיתי האמורי והפריזי והיבוסי והגרגשי, לתת לזרעו; ותקם, את-דבריך, כי צדיק, אתה.  ט ותרא את-עוני אבותינו, במצריים; ואת-זעקתם שמעת, על-ים-סוף.  י ותיתן אותות ומופתים בפרעה ובכל-עבדיו, ובכל-עם ארצו--כי ידעת, כי הזידו עליהם; ותעש-לך שם, כהיום הזה.  יא והים בקעת לפניהם, ויעברו בתוך-הים ביבשה; ואת-רודפיהם השלכת במצולות, כמו-אבן--במים עזים.  יב ובעמוד ענן, הנחיתם יומם; ובעמוד אש, לילה, להאיר להם, את-הדרך אשר ילכו-בה.  יג ועל הר-סיניי ירדת, ודבר עימהם משמיים; ותיתן להם משפטים ישרים, ותורות אמת--חוקים ומצוות, טובים.  יד ואת-שבת קודשך, הודעת להם; ומצוות וחוקים, ותורה, ציווית להם, ביד משה עבדך.  טו ולחם משמיים נתת להם, לרעבם, ומים מסלע הוצאת להם, לצמאם; ותאמר להם, לבוא לרשת את-הארץ, אשר-נשאת את-ידך, לתת להם.  טז והם ואבותינו, הזידו; ויקשו, את-עורפם, ולא שמעו, אל-מצוותיך.  יז וימאנו לשמוע, ולא-זכרו נפלאותיך אשר עשית עימהם, ויקשו את-עורפם, וייתנו-ראש לשוב לעבדותם במריים; ואתה אלוה סליחות חנון ורחום, ארך-אפיים ורב-חסד--ולא עזבתם.  יח אף, כי-עשו להם עגל מסכה, ויאמרו, זה אלוהיך אשר העלך ממצריים; ויעשו, נאצות גדולות.  יט ואתה ברחמיך הרבים, לא עזבתם במדבר; את-עמוד הענן לא-סר מעליהם ביומם, להנחותם בהדרך, ואת-עמוד האש בלילה להאיר להם, ואת-הדרך אשר ילכו-בה.  כ ורוחך, הטובה, נתת, להשכילם; ומנך לא-מנעת מפיהם, ומים נתת להם לצמאם.  כא וארבעים שנה כילכלתם במדבר, לא חסרו; שלמותיהם לא בלו, ורגליהם לא בצקו.  כב ותיתן להם ממלכות ועממים, ותחלקם לפיאה; ויירשו את-ארץ סיחון, ואת-ארץ מלך חשבון, ואת-ארץ, עוג מלך-הבשן.  כג ובניהם הרבית, ככוכבי השמיים; ותביאם, אל-הארץ, אשר-אמרת לאבותיהם, לבוא לרשת.  כד ויבואו הבנים, ויירשו את-הארץ, ותכנע לפניהם את-יושבי הארץ הכנענים, ותיתנם בידם; ואת-מלכיהם ואת-עממי הארץ, לעשות בהם כרצונם.  כה וילכדו ערים בצורות, ואדמה שמנה, ויירשו בתים מלאים-כל-טוב בורות חצובים כרמים וזיתים ועץ מאכל, לרוב; ויאכלו וישבעו וישמינו, ויתעדנו בטובך הגדול.  כו וימרו וימרדו בך, וישליכו את-תורתך אחרי גוום, ואת-נביאיך הרגו, אשר-העידו בם להשיבם אליך; ויעשו, נאצות גדולות.  כז ותיתנם ביד צריהם, ויצרו להם; ובעת צרתם, יצעקו אליך, ואתה משמיים תשמע, וכרחמיך הרבים תיתן להם מושיעים ויושיעום מיד צריהם.  כח וכנוח להם--ישובו, לעשות רע לפניך; ותעזבם ביד אויביהם, וירדו בהם, וישובו ויזעקוך, ואתה משמיים תשמע ותצילם כרחמיך רבות עיתים.  כט ותעד בהם להשיבם אל-תורתך, והמה הזידו ולא-שמעו למצוותיך ובמשפטיך חטאו-בם, אשר-יעשה אדם, וחיה בהם; וייתנו כתף סוררת, ועורפם הקשו ולא שמעו.  ל ותמשוך עליהם שנים רבות, ותעד בם ברוחך ביד-נביאיך ולא האזינו; ותיתנם, ביד עמי הארצות.  לא וברחמיך הרבים לא-עשיתם כלה, ולא עזבתם:  כי אל-חנון ורחום, אתה.  לב ועתה אלוהינו האל הגדול הגיבור והנורא, שומר הברית והחסד--אל-ימעט לפניך את כל-התלאה אשר-מצאתנו למלכינו לשרינו ולכוהנינו ולנביאינו ולאבותינו, ולכל-עמך:  מימי מלכי אשור, עד היום הזה.  לג ואתה צדיק, על כל-הבא עלינו:  כי-אמת עשית, ואנחנו הרשענו.  לד ואת-מלכינו שרינו כוהנינו ואבותינו, לא עשו תורתך; ולא הקשיבו, אל-מצוותיך, ולעדוותיך, אשר העידות בהם.  לה והם במלכותם ובטובך הרב אשר-נתת להם, ובארץ הרחבה והשמנה אשר-נתת לפניהם--לא עבדוך; ולא-שבו, ממעלליהם הרעים.  לו הנה אנחנו היום, עבדים; והארץ אשר-נתת לאבותינו, לאכול את-פרייה ואת-טובה--הנה אנחנו עבדים, עליה.  לז ותבואתה מרבה, למלכים אשר-נתת עלינו--בחטאותינו; ועל גווייותינו מושלים ובבהמתנו, כרצונם, ובצרה גדולה, אנחנו.  {פ}


תנ"ך מנוקד
 
תנ"ך - עזרא / נחמיה - הכול
עזרא פרק א ב ג ד ה ו ז ח ט י - נחמיה פרק א ב ג ד ה ו ז ח ט י יא יב יג


יש לך שאלה או הערה?