תנ"ך מנוקד

תנ"ך - דברים - הכול
פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא לב לג לד

דברים פרק כז

א ויצו משה וזקני ישראל, את־העם לאמור: שמור, את־כל־המצוה, אשר אנוכי מצווה אתכם, היום. ב והיה, ביום אשר תעברו את־הירדן, אל־הארץ, אשר־יהוה אלוהיך נותן לך--והקמות לך אבנים גדולות, ושדת אותם בשיד. ג וכתבת עליהן, את־כל־דברי התורה הזאת--בעוברך: למען אשר תבוא אל־הארץ אשר־יהוה אלוהיך נותן לך, ארץ זבת חלב ודבש, כאשר דיבר יהוה אלוהי־אבותיך, לך. ד והיה, בעוברכם את־הירדן, תקימו את־האבנים האלה אשר אנוכי מצווה אתכם היום, בהר עיבל; ושדת אותם, בשיד. ה ובנית שם מזבח, ליהוה אלוהיך: מזבח אבנים, לא־תניף עליהם ברזל. ו אבנים שלמות תבנה, את־מזבח יהוה אלוהיך; והעלית עליו עולות, ליהוה אלוהיך. ז וזבחת שלמים, ואכלת שם; ושמחת, לפני יהוה אלוהיך. ח וכתבת על־האבנים, את־כל־דברי התורה הזאת--באר היטב. {ס}

ט וידבר משה והכוהנים הלויים, אל כל־ישראל לאמור: הסכת ושמע, ישראל, היום הזה נהיית לעם, ליהוה אלוהיך. י ושמעת, בקול יהוה אלוהיך; ועשית את־מצוותיו ואת־חוקיו, אשר אנוכי מצווך היום. {ס}

יא ויצו משה את־העם, ביום ההוא לאמור. יב אלה יעמדו לברך את־העם, על־הר גריזים, בעוברכם, את־הירדן: שמעון ולוי ויהודה, ויששכר ויוסף ובנימין. יג ואלה יעמדו על־הקללה, בהר עיבל: ראובן גד ואשר, וזבולון דן ונפתלי. יד וענו הלויים, ואמרו אל־כל־איש ישראל--קול רם. {ס}

טו ארור האיש אשר יעשה פסל ומסכה תועבת יהוה, מעשה ידי חרש--ושם בסתר; וענו כל־העם ואמרו, אמן. {ס}

טז ארור, מקלה אביו ואימו; ואמר כל־העם, אמן. {ס}

יז ארור, מסיג גבול ריעהו; ואמר כל־העם, אמן. {ס}

יח ארור, משגה עיוור בדרך; ואמר כל־העם, אמן. {ס}

יט ארור, מטה משפט גר־יתום--ואלמנה; ואמר כל־העם, אמן. כ ארור, שוכב עם־אשת אביו--כי גילה, כנף אביו; ואמר כל־העם, אמן. {ס}

כא ארור, שוכב עם־כל־בהמה; ואמר כל־העם, אמן. {ס}

כב ארור, שוכב עם־אחותו--בת־אביו, או בת־אימו; ואמר כל־העם, אמן. {ס}

כג ארור, שוכב עם־חותנתו; ואמר כל־העם, אמן. {ס}

כד ארור, מכה ריעהו בסתר; ואמר כל־העם, אמן. {ס}

כה ארור לוקח שוחד, להכות נפש דם נקי; ואמר כל־העם, אמן. {ס}

כו ארור, אשר לא־יקים את־דברי התורה־הזאת--לעשות אותם; ואמר כל־העם, אמן. {פ}